3 ຄົນ · ປານກາງ · 20 ນາທີ · ₭ ປານກາງ

ກຸ້ງແຊ່ນ້ຳປາ ແມ່ນເມນູຂອງແກ້ມ ຍອດຮິດ, ເວລາຊຸມກັນ ຕ້ອງມີເມນູນີ້ ແນ່ນອນ ເສີບພ້ອມ ນ້ຳລຳໄຍ :)

ເຄື່ອງປຸງ

• ກຸ້ງສົດ ຂະໜາດກາງ ½ ກິໂລ
• ເຜັດດິບ 10 ໜ່ວຍ
• ກະທຽມສົດ 5 ກີບ
• ຂີງສົດ 1 ຫົວ
• ເກືອເມັດໃຫຍ່ 1 ບ່ວງກາເຟ
• ແປ້ງນົວ ½ ບ່ວງແກງ
• ນ້ຳປາ 2 ບ່ວງແກງ
• ນ້ຳຕານ 2 ບ່ວງແກງ
• ໝາກນາວ 1 ໜ່ວຍ, ບີບເອົາແຕ່ນ້ຳ
• ຮາກຜັກຫອມປ້ອມ 4 ຮາກ, ຕັດເປັນຕ່ອນ
• ຜັກກະລ່ຳປີ ½ ຫົວ, (ຊອຍແລບໆແຊ່ນ້ຳກ້ອນໄວ້ໃຫ້ກອບ)
• ກາລົດ ½ ຫົວ, (ຊອຍແລບໆແຊ່ນ້ຳກ້ອນໄວ້ໃຫ້ກອບ)
• ຜັກບົວລະພາ 3 ບ່ວງແກງ
• ໝາກແຕງ 2 ໜ່ວຍ, (ຊອຍເປັນປ່ຽງ ແຊນ້ຳກ້ອນ) ຖ້າບໍ່ມັກກໍ່ໃສ່ເປັນຫມາກມະລະກໍ່ໄດ້ ເອົາແກນອອກ ແລ້ວຊອຍແຊ່ນ້ຳກ້ອນ
• ກະທຽມສົດ 4 ກີບ, ຊອຍບາງໆ ໄວ້ວາງໃສ່ຈານ
• ນ້ຳໂຊດາ 1 ປ໋ອງ

ວິທີເຮັດ

1. ເອົາກຸ້ງແກະເປຶອກ, ປາດຂີ້ເສັ້ນດຳໆອອກ, ເອົາຫົວອອກ ແລະ ລ້າງໃຫ້ສະອາດ, ແຊ່ໂຊດາປະໄວ້ ປະມານ 15 ນາທີ.

2. ເອົາຫມາກເຜັດ+ກະທຽມ+ຂີງ+ເກືອ+ນ້ຳຕານ+ແປ້ງນົວ+ຮາກຫອມປ້ອມ+ນ້ຳຫມາກນາວ+ນ້ຳປາ ໃສ່ເຄື່ອງປັ່ນ, ປັ່ນໃຫ້ລະອຽດ ຊິມເບິ່ງ ສາມາດປຸງລົດຊາດ ເພີ່ມໄດ້ຕາມມັກ.

3. ນຳເອົາຫມາກແຕງ+ກະລ່ຳ+ກາລົດ ແລະ ກຸ້ງ ຈັດໃສ່ຈານ, ເອົາຜັກບົວລະພາ ແລະ ກະທຽມ ວາງໃສ່ ແລ້ວ ລາດດ້ວຍແຈ່ວ. ຕຽມມ່ຳ ກັບ ນ້ຳລຳໄຍ ເຢັນໆ.