4 ຄົນ · ປານກາງ · 40 ນາທີ · ₭ ປານກາງ

ສຳລັບ ອາຫານ ວັນນີ້ ຂໍສະເໜີ 'ກ້ອຍປາ' ລົດຊາດທີ່ ແຊບ ເກີນຄຳບັນຍາຍ. ກິນແລ້ວ ອີ່ມປານໃດ ກະບໍ່ຢາກເຊົາ. ເຮັດຍາມໃດກະແຊບຍາມນັ້ນ. ເບິ່ງວີທີເຮັດທາງລຸ່ມນີ້ເດີ:

ເຄື່ອງປຸງ

• ປາ 1 ກິໂລ, ປາຫນັງ
• ໝາກນາວ 5 ໜ່ວຍ, 4 ຫນ່ວຍໃສ່ ຕອນກ່ອນລວກປາ
• ເກືອ 1 ບ່ວງກາເຟ
• ນ້ຳປາ 2 ບ່ວງແກງ
• ເຂົ້າຂົ້ວ 3 ບ່ວງແກງ
• ແປ້ງນົວ 1 ບ່ວງແກງ, ບໍ່ໃສ່ກະໄດ້
• ກະທຽມ 5 ກີບ
• ຫອມບົ່ວແດງ 4 ຫົວ
• ຫອມລາບ ½ ຖ້ວຍນ້ອຍ
• ຫອມເປ ½ ຖ້ວຍນ້ອຍ
• ຫອມບົ່ວໃບ 2 ບ່ວງແກງ
• ເຜັດດິບ 4 ໜ່ວຍ, ເພີ່ມລົດໄດ້
• ນ້ຳ ½ ລິດ

ວິທີເຮັດ

ຂັ້ນຕອນ 1. ຖ້າປາເປັນໂຕໃຫ້ລືບເອົາແຕ່ຊີ້ນປາ ມາຊອຍເປັນຕ່ອນຫນາປະມານ 2 ເຊັນ. ແລ້ວຄັ້ນເບົາໆໃສ່ນ້ຳຫມາກນາວ ແຊ່ປະໄວ້ປະມານ 15 ນາທີ.

ຂັ້ນຕອນ 2. ຄ້າງຫມໍ້ ໃສ່ນ້ຳ ຕື່ມເກືອ, ຕົ້້ມໃຫ້ຟົດ, ປັ້ນນ້ຳຫມາກນາວ ອອກຈາກປາ ແລ້ວເອົາ ປາລົງລວກ ປະມານ 2 ຫາ 3 ນາທີ ແລ້ວເອົາຂຶ້ນ ພັກໄວ້ໃນຊາມ.

ຂັ້ນຕອນ 3. ພໍປາເຢັນລົງ ໃຫ້ ເອົາ ນ້ຳປາ, ແປ້ງນົວ, ຫມາກນາວ,ກະທຽມ ຫອມບົ່ວແດງລົງໄປ ແລ້ວຄົນ ເບົາໆ. ຈາກນັ້ນໃສ່ ເຂົ້າຂົ້ວ, ຫມາກເຜັດ ແລະ ຫອມຊອຍຕ່າງໆລົງໄປ. ຊີມລົດຊາດ ພ້ອມເສີບ ກັບເຂົ້າຫນຽວ. ແຊບ!!

ເຄັດລັບ: ທີ່ເອົາປາແຊ່ຫມາກນາວກ່ອນລວກ ເຮັດໃຊ້ຊີ້ນປາບໍ່ເລະ. ຄວນຊີມປາກ່ອນໃສ່ຫມາກນາວຕອນປຸງເຄື່ອງ.