4 ຄົນ · ປານກາງ · 60 ນາທີ · ₭ ຖືກ

ເຄີຍກິນຢູ່ຫວາ ແກງໝາກມີ້? ໄທໃນເມືອງ ຄືຊິບໍ່ຄ່ອຍ ໄດ້ກິນດອກເນາະ. ແຕ່ ຕ່າງແຂວງ ຫລື ຄົນຢູ່ຮົ້ວ ຢູ່ສວນ ເຮົາຮູ້ ເມນູນີ້ດີ ເພາະ ມີຕົ້ນໝາກມີ້ຫລາຍ. ເຄັດລັບ ຄວາມແຊບ ແມ່ນຕ້ອງເລືອກໝາກມີ້ ໃຫ້ໄດ້, ບໍ່ ອ່ອນເກີນໄປ ເພາະຈະບໍ່ມີດຸມ. ແລະ ບໍ່ແກ່ ເກີນໄປ ເພາະ ແກ່ນມັນຈະ ແຂງໂພດ. ແລ້ວ ອີກຢ່າງ ເວລາປອກນີ້ ແມ່ນ ຫາຍະນະ ເລີຍລະ. ເພາະມັນມີຢາງໜຽວຕິດມື. ສະຫລຸບ ງ່າຍໆກະຄື ໄປຊື້້ ອັນເຂົາປອກແລ້ວ ໃນຕະຫລາດ ລະມາແກງຕາມ ສູດນີ້ ເອົາສາເນາະ :)

ວິດິໂອ

ເຄື່ອງປຸງ

• ໝາກມີ້ອ່ອນ 500 ກຣາມ, ປອກ, ຕັດເປັນຕ່ອນ ແລະ ລ້າງໃຫ້ ຢາງມັນອອກ
• ຊີ້ນໝູສົດ 200 ກຣາມ, ຕັດເປັນຕ່ອນແກງ ພໍດີຄຳ
• ຫົວສີໄຄ 2 ກ້ານ, ທຸບພໍແຕກ
• ນ້ຳຢານາງ 1.5 ລິດ
• ເຂົ້າເບືອ 1 ຖ້ວຍນ້ອຍ
• ປາແດກ 2 ບ່ວງແກງ
• ເກືອ 1 ບ່ວງແກງ
• ນ້ຳຕານ 1 ບ່ວງກາເຟ, ບໍ່ມັກບໍ່ໃສ່ກະໄດ້
• ແປ້ງນົວ 1 ບ່ວງກາເຟ, ບໍ່ມັກບໍ່ໃສ່ກະໄດ້

ວິທີເຮັດ

1. ຄ້າງໝໍ້ ໃສ່ນ້ຳຢານາງລົງໄປ. ຕາມດ້ວຍ ຫົວສີໄຄທຸບ ແລະ ໃສ່ ໝາກມີ້

2. ປຸງເຄື່ອງທັງໝົດ ລົງໄປ ແລະ ໃສ່ຊີ້ນໝູ. ປິດຝາໝໍ້ ຕົ້ມໄວ້ 30 ນາທີ.

3. ຊີມລົດຊາດ ໃຫ້ພໍດີ ແລ້ວ ຕັກໃສ່ຖ້ວຍ ເສີບ ກິນເຂົ້າສວາຍ ຮ້ອນໆ ເລີຍ :)