2 ຄົນ · ປານກາງ · 30 ນາທີ · ₭ ຖືກ

ໃຜກິນຫອຍ? ໃຜມັກກິນເຜັດ? ເຊີນທາງນີ້ເລີຍ. ຕຳຫອຍໂປ້ ແບບບໍ່ແກະເປືອກ. ມັນກະຊິໄດ້ອາລົມ ແບບ ນ້ຳຕຳເຜັດໆ ຊຶມເຂົ້າໄປໃນ ແລ້ວຈິ້ມ ມັນອອກມາກິນເລີຍ :)

ເຄື່ອງປຸງ

ເຄື່ອງຕົ້ມຫອຍ

• ຫອຍໂປ້ 1 ກິໂລ, ລ້າງໃຫ້ສະອາດ
• ນ້ຳ 2 ລິດ
• ເກືອ 1 ບ່ວງກາເຟ
• ຫົວສີໄຄ 2 ກ້ານ, ທຸບໃຫ້ແຕກ
• ຂ່າ 4 ປ່ຽງ
• ໃບຂີ້ຫູດ 4 ໃບ

ເຄື່ອງເຮັດນ້ຳຕຳ

• ເຜັດດິບ 10 ໜ່ວຍ, ໃສ່ຕາມໃຈມັກ
• ກະທຽມສົດ 2 ກີບ
• ກະປິ 1 ບ່ວງກາເຟ
• ນ້ຳຕານ 1 ບ່ວງແກງ
• ແປ້ງນົວ 1 ບ່ວງກາເຟ
• ປາແດກ 2 ບ່ວງແກງ
• ໝາກນາວ 1 ໜ່ວຍ
• ຫມາກເລັ່ນນ້ອຍ 4 ໜ່ວຍ, ຊອຍເປັນຕ່ອນນ້ອຍ
• ຫອມເປຊອຍ 2 ບ່ວງແກງ

ວິທີເຮັດ

1. ຄ້າງໝໍ້, ໃສ່ນ້ຳ, ເກືອ, ຫົວສີໄຄ, ຂ່າ, ໃບຂີ້ຫູດ ແລະ ຫອຍລົງ. ຕົ້ມໄຟ ແຮງໃຫ້ຟົດ ປະມານ 15 ນາທີ ຫລື ຈົນເກັດ ຫອຍຫລຸດອອກ ຖືວ່າສຸກ. ແລ້ວຕັກ ເອົາ ແຕ່ຫອຍອອກໄວ້ ຊາມ ປະໃຫ້ເຢັນ.

2. ກຽມຄົກ ແລະ ສາກ ມາຕຳເຄື່ອງ: ໃສ່ໝາກເຜັດ, ກະທຽມ, ກະປິ, ນ້ຳຕານ, ແປ້ງນົວ. ຕຳໃຫ້ແຫລກ.

3. ໃສ່ ປາແດກ, ໝາກເລັ່ນ ຊອຍ, ແລະ ບີບໝາກນາວລົງ. ຍວກໆ ໃຫ້ເຂົ້າກັນ ແລ້ວ ຊີມລົດຕາມໃຈມັກ.

4. ເອົານ້ຳທີ່ຕຳນັ້ນ ຖອກລົງ ຊາມຫອຍ, ແລ້ວ ໃສ່ ຫອມເປຊອຍ. ໃຊ້ ຈອງຄົນໃຫ້ເຂົ້າກັນດີ. ເປັນອັນວ່າ ກຽມແຊບໄດ້.