4 ຄົນ · ປານກາງ · 80 ນາທີ · ₭ ປານກາງ

ຢາກບອກວ່າ ໄກ່ ຢາຊາ ເປັນອາຫານປະຈຳຊາດຂອງ ປະເທດເຊເນການເລີຍກະວ່າໄດ້. ຂ້ອຍ ມີໂອກາດ ໄດ້ໄປຢູ່ ແລະ ໄດ້ກິນເມນູນີ້ປະຈຳ. ນີ້ແມ່ນສູດຂອງແມ່ບ້ານຂ້ອຍເອງ. ໃຜຢາກລອງສິ່ງໃຫມ່ໆ ເບິ່ງສູດນີ້ລະກະເຮັດຕາມໄດ້ເລີຍ :)

ເຄື່ອງປຸງ

• ຂາໂຕ້ໄກ່ ຕິດຫນັງ 4 ຕ່ອນ
• ຫອມບົ່ວໃຫຍ່ 2 ຫົວ, ຊ້ອຍນ້ອຍເປັນລູກເຕົາ
• ກະທຽມ 6 ກີບ
• ຂີງ 2 ປ່ຽງ
• ໝາກເຜັດແຫ້ງ 4 ໜ່ວຍ, ເອົາເຜັດອື່ນແທນໄດ້,​ຫລືບໍ່ໃສ່ກະໄດ້
• ເຜັດຂຽວໃຫຍ່ ½ ໜ່ວຍ, ຊ້ອຍນ້ອຍເປັນລູກເຕົາ
• ພາສລີ້ 2 ບ່ວງແກງ, ຊອຍຕ່ອນນ້ອຍ
• ໝາກນາວ 1 ໜ່ວຍ
• ເກືອ 1 ບ່ວງກາເຟ
• ພິກໄທດຳປົ່ນ 1 ບ່ວງກາເຟ
• ຄະນໍກ້ອນ ລົດໄກ່ 1 ກ້ອນ
• ສະອິ້ວ 1 ບ່ວງກາເຟ
• ມັສຕາດ ( ໃຊ້ແບບ ດີຈົງ) 1 ບ່ວງແກງ
• ເບລີຟ 3 ໃບ
• ໄທມແຫ້ງ 1 ບ່ວງກາເຟ

ວິທີເຮັດ

1. ປາດໄກ່ ພໍໃຫ້ສະຫລຽງ ຍັດເຄື່ອງໃສ່ໄດ້, ແລ້ວປະໄວ້

2. ກຽມເຄື່ອງຍັດໃສ່ໄກ່:

- ຕຳກະທຽມ+ຂີງ+ຫອມພາສລີ່+ເກືອ+ໝາກເຜັດແຫ້ງ (ບໍ່ມັກເຜັດບໍ່ໃສ່)​

3. ເອົາເຄື່ອງທີ່ຕຳນັ້້ນ ຍັດໃສ່ໃນຂາໄກ່ທີ່ປາດໄວ້ນັ້ນ. ແລ້ວບີບໝາກນາວຮວດເທິງໄກ່.

4. ໃສ່ນ້ຳມັນຫນ້ອຍໜຶ່ງ ໃນກະທະ ພໍຮ້ອນໃຫ້ ໃສ່ໄກ່ລົງໄປ, ປິດຝາໄວ້ ເຮັດໄຟອ່ອນໆ ຈົນກວ່າ ຈະສຸກ. ແລະ ປິດໄຟໄວ້.

5. ກຽມນ້ຳຊ໊ອສ

- ຕຳພິກໄທດຳ,​ເຜັດໃຫຍ່ຂຽວ​ແລະ​ຫົວບົ່ວໃຫຍ່ ລົງໄປຕຳພໍຫຍາບໆ.​

6. ໃຊ້ຫມໍ້ຂາງໃຫຍ່, ໃສ່ນ້ຳມັນປະມານ 4 ບ່ວງແກງ ລົງໄປ, ພໍຮ້ອນໃຫ້ໃສ່ ເຄື່ອງທີ່ຕຳນັ້ນລົງໄປຂົ້ວຈົນຫອມ ແລ້ວ ຕື່ມນ້ຳ ພໍຖ້ວມ. ຕາມດ້ວຍ ໃບ ທາມ ແລະ ເບລີຟ (ສອງຢ່າງນີ້ມັນມັກມາຄູ່ກັນ).ແລ້ວ ປຸງລົດດ້ວຍ ສະອິ້ວ​ແລະ ຄະນໍກ້ອນ(ລົດໄກ່) ເຮັດໄຟອ່ອນ ແລະ ໃຫ້ຫົວບົ່ວສຸກອ່ອນ ແລະ ເປັນ ສີໃສ ສະແດງວ່າໃຊ້ໄດ້. (ລະວັງຢ່າໃຫ້ນ້ຳແຫ້ງຫລາຍ).​

7. ເທຊ໊ອສນີ້​ໃສ່ຫມໍ້ໄກ່, ແລ້ວ ເອົາ ມາສຕາດ ໃສ່ , ຄົນໃຫ້ທັງໝົດ ເຂົ້າກັນ ແລະ ນ້ຳໃຫ້ ແຫ້ງພໍດີ. ໃຫ້ບີບໝາກນາວໃສ່ ອີກບາດຫນຶ່ງ. ຊີມລົດຊາດໃຫ້ພໍດີ.​ ແລ້ວ ຕັກເສີບ ກັບເຂົ້າຈ້າວ. ແຊບ ແບບ ອາຟຣິກາ :)